Apellyasiya Məhkəməsi İkram Rəhimovun cəza müddətini azaldıb
Sentyabrın 18-də Bakı Apellyasiya Məhkəməsində Realliq.info saytının redaktoru İkram Rəhimovun barəsində hökmdən şikayətə baxılması başa çatıb.
Apellyasiya instansiyası İ.Rəhimovun hədə yolu ilə pul tələb etməkdə təqsirli olduğunu təsdiqləyib. Laki məhkəmə onun barəsində CM-in 62-ci maddəsini (qanunla nəzərdə tutulduğundan az cəza təyin etmək) tətbiq edərək həbs müddətini 5,5 ildən 3 ilədək azaldıb.
Bu barədə Turan-a İ.Rəhimovun yaxınları bildiriblər. Onların sözlərinə görə, İ.Rəhimov son sözündə deyib ki, Azərbaycan prezidentinin ictimai-siyasi məsələlər üzrə köməkçisi Əli Həsənovu və onun nəzarətində olan Mətbuat Şurasını tənqid etdiyinə görə uydurma ittihamla təqib olunur. O xəbərdarlıq edib ki, əgər məhkəmə onu azad etməsə yenidən aclığa başlayacaq.
*Realliq.info saytının redaktoru İkram Rəhimov 2018-ci il oktyabrın 26-da hədə yolu ilə pul tələb etməkdə ittiham olunaraq həbs edilib.
İyunun 12-də məhkəmə onu 5,5 il müddətinə azadlıqdan məhrum edib. Avqustun 7-də Bakı Apellyasiya Məhkəməsində İ.Rəhimovun işi üzrə ilkin iclas keçirilib. Müdafiə tərəfi təkrar məhkəmə istintaqı, birinci instansiya məhkəməsində ifadələr saxtalaşdırıldığına görə şahidlərin və zərərçəkənlərin yenidən dindirilməsi barədə vəsatət qaldırıb.
Vəkil həmin səbəbdən İ.Rəhimovun telefon danışıqlarının audioyazısının təkrar ekspertizasının təyin edilməsini xahiş edib. Lakin vəsatət təmin edilməyib. İ.Rəhimov etiraz olaraq alcığa başlayıb və onu alcığın 30-cü günü, sentyabrın 5-də dayandırıb.
