Azərbaycanda neçə məscid, kilsə və sinaqoq var?
Bu gün – 5 oktyabrda Prezident İlham Əliyev Ağdamda keçirilən Azərbaycan Milli Şəhərsalma Forumunda çıxışı edib. Prezident çıxışı zamanı işğaldan azad olunmuş ərazilərdəki məscidlərlə bağlı statistik məlumatlardan danışıb. O bildirib ki, sözügedənərazilərdə mövcud olan 67 məsciddən 65-i tamamilə dağıdılıb.
Bəs görəsən Azərbaycanda ümumilikdə neçə məscid, kilsə və sinaqoq var? Dövlət qeydiyyatından keçən dini qurumlar nə qədərdir və bunlar əsasən hansı dini təmayüllüdür? İşğaldan azad olunmuş ərazilərimizdə indiyədək nə qədər tarixi-dini abidələr təsbit edilmişdir? Ümumiyyətlə ölkəmizdə nə qədər pir və ziyarətgah yeri mövcuddur?
Yeniavaz.com Dini Qurumlarla İş üzrə Dövlət Komitəsinin rəsmi saytına istinadən xəbər verir ki, dini qurumların yenidən dövlət qeydiyyatına alınması prosesi başlayandan (01.09.2009-cu il) bu günədək 993 dini qurum dövlət qeydiyyatına alınıb. Konfessional baxımdan onlardan 956-ı İslam, 37-si isə qeyri-islam (xristian – 26; yəhudi – 8; krişna – 1; bəhai – 2) təmayüllüdür.
Hazırda respublikamızda Azərbaycan İlahiyyat İnstitutu və 5 dini təhsil müəssisəsi (İslam kolleci) fəalliyyət göstərir.
Ölkə ərazisində 2253 məscid mövcuddur. Habelə, respublikada 16 kilsə və 7 sinaqoq fəaliyyət göstərir. Ölkədə ümumilikdə 748 pir və ziyarətgah müəyyən edilib.
İşğaldan azad olunmuş ərazilərimizdə indiyədək təsbit olunan tarixi-dini abidələrdən 67-si məscid, 139-u məbəd, 192-si ziyarətgahdır. İşğaldan azad olunmuş ərazilərimizdəki 67 məsciddən (Şuşada 13, Ağdamda 5, Füzulidə 16, Zəngilanda 12, Cəbrayılda 5, Qubadlıda 8, Laçında 8) 63-ü tamamilə, 4-ü isə qismən dağıdılaraq yararsız hala salınıb.
