“Zirehli avtobus tapmaq variantımız yoxdur” – Qrosso sərt tədbirlər görülməsini istəyir
“Olimpik Lion”un baş məşqçisi Fabio Qrosso “Olimpik Marsel” fanatlarının hücumundan danışıb.
Fanat.az xəbər verir ki, “ITASportPress” onun dediklərini belə çatdırıb:
“Olimpik Marsel”ə və onun azarkeşlərinə qarşı deyiləm, amma zirehli avtobus tapmaq variantımız yoxdur. Xuliqanlara qarşı sərt qərarlar qəbul edilməlidir. Belə olmasa, bunu yenidən edəcəklər”.
Liqa 1-in 10-cu turu çərçivəsində keçirilməli olan “Olimpik Marsel” – “Olimpik Lion” matçı yerli fanatlar qonaq komandanın avtobusunu daşqalaq etdikləri üçün təxirə salınmışdı. Hadisə nəticəsində Qrosso ciddi xəsarətlər – üz nahiyəsindən kəsik yaraları almışdı. Artıq həmin görüşün dekabrın 6-da keçiriləcəyi açıqlanıb.
Oxşar hadisə 2019-cu ildə də yaşanmışdı. Həmin vaxt da “Marsel” tərəfdarları eyni komandanın avtobusuna hücum çəkmişdilər.
