Fransa səfiri: Əminəm ki, istənilən anlaşılmazlıq aradan qaldırıla bilər
Fransanın Azərbaycan Respublikasındakı səfiri Zaxari Qross Azərbaycan ilə Ermənistan arasında davam edən danışıqlar prosesindən yazıb.
AzToday.az Turan-a istinadən səfirin məqaləsini təqdim edir:
Praqa: sülhə gedən yolda əsas mərhələdir
Azərbaycan ilə Ermənistan arasında hazırkı sülh prosesi başlayandan tərəflərin əsas məqsədlərindən biri hər bir ölkənin ərazi bütövlüyünün və suverenliyinin qarşılıqlı surətdə tanınması idi. Faktiki olaraq, bu bənd Azərbaycanın qətiyyətlə müdafiə etdiyi beş prinsipdən biridir.
Bu səbəbdən Azərbaycan Prezidentinin, Ermənistanın Baş nazirinin, Fransa prezidentinin və Avropa Şurası sədrinin Görüşünün yekunlarına dair Praqada qəbul edilmiş Birgə Bəyanat əhəmiyyətli sıçrayış və mühüm mərhələ oldu, çünki bəyanatda göstərilir ki, “Ermənistan və Azərbaycan Hər iki dövlətin ərazi bütövlüyünü və bir-birinin suverenliyini tanıdığı Birləşmiş Millətlər Təşkilatının Nizamnaməsinə və 1991-ci il Alma-atin bəyannaməsinə sadiq olduqlarını təsdiq etmişlər”. Azərbaycan və Ermənistan da “bunun sərhədlərin delimitasiyası üzrə komissiyaların işi üçün əsas olacağını və sərhəd komissiyalarının növbəti iclasının oktyabrın sonuna qədər Brüsseldə keçiriləcəyini təsdiqləyiblər”.
Azərbaycan ilə Ermənistan arasında gərginliyin bir neçə həftəsindən sonra bu bəyanat tərəflərin sülhə sadiqliyinin çoxdan gözlənilən əlaməti oldu. Demək olar ki, bir il ərzində Aİ-nin sülh prosesinə fəal dəstəyi əvəzsizdir və Fransa prezidentinin iştirakı Praqada uğurlu nəticə əldə etmək üçün həlledici əhəmiyyətə malikdir. Digər ölkələr mühüm vasitəçilik rolu oynayıblar ki, bu da onu göstərir ki, beynəlxalq birlik hesab edir ki, sülh quruculuğu problemlərini aradan qaldırmaq və Ermənistanla Azərbaycan arasında münaqişəni keçmişdə qoymaq vaxtı gəlib çatmışdır.
Millətlər arasında dostluq, insanlar arasında olduğu kimi, sıfır məbləğli bir oyun deyil. Fransa Cənubi Qafqazın hər üç dövləti ilə dostluq münasibətlərini saxlayır, necə ki, Azərbaycan bir çox Avropa ölkələri ilə dostluq münasibətlərinə malikdir. Fransa ilə Azərbaycan arasında ikitərəfli münasibətlər mühüm, intensiv və uzunömürlüdür və onlar Azərbaycan müstəqillik əldə etdiyi 31 il bundan əvvəl ölkələrimizin liderlərinin Şəxsi töhfəsindən faydalanmışlar. Bu səbəbdən mən əminəm ki, istənilən anlaşılmazlıq aradan qaldırıla bilər.
Fransa və Azərbaycanda təcrübə və xoş iradə var və mən şübhə etmirəm ki, birlikdə biz müstəqil, suveren Avropa dövlətləri arasında sülh sahəsində əməkdaşlığın ümumi məqsədinə nail olacağıq, bu, Fransanın və Azərbaycanın oktyabrın 7-də Praqada digər 42 ölkə ilə birlikdə işə saldığı Avropa siyasi birliyi tərəfindən nəzərdə tutulmuşdur.
Yaşasın Praqa ruhu! Yaşasın Franko-Azərbaycan dostluğu! Qoy Ermənistan ilə Azərbaycan arasında tezliklə sülh əldə edilsin!
