Elmlər Akademiyasında repressiya dalğası: Mehriban Əliyevaya şikayət olundu

AMEA Rəyasət Heyəti Təhsil şöbəsi Doktorantura sektorunun müdiri, biologiya üzrə fəlsəfə doktoru, dosent Tubuxanım Eman qızı Qasımzadə AMEA- dan Mehriban xanım Əliyevaya şikayət edib.

Sirəti cumhuriyyet.az-a göndərilən həmin şikayət məktubunu olduğu kimi dərc edirik:

“Çox hörmətli Mehriban xanım!

Başqa yolum qalmadığı üçün Sizi narahat etmək məcburiyyətindəyəm. 20 ildir ki, AMEA sistemində işləyirəm, 10 il AMEA Rəyasət Heyətində və AR Prezidenti yanında Ali Attestasiya Komissiyasında çalışmışam. 2021-ci ildən AMEA Rəyasət Heyəti aparatının Təhsil şöbəsinin Doktorantura sektorunun müdiriyəm.

Biologiya üzrə fəlsəfə doktoru, dosentəm. Cari ilin 8 iyun tarixində doktorluq dissertasiyasını müdafiə etmişəm. 112 elmi əsərin müəllifiyəm. Ümumilikdə həyatımın 22 ilini elmə həsr etmişəm. Həmişə ləyagətimi və təmiz adımı qoruyub saxlamışam. Akademiklər Feyzulla Qasımzadə və Mikayıl Useynovun nəvəsiyəm, akademik Fuad Qasımzadənin qardaşı qızıyam. 02 fevral 2007-ci il tarixi ən xoşbəxt gün kimi yaddaşıma həkk olunub, həmin gün Gənclər gününün 10-illiyi münasibətilə Möhtərəm cənab Prezident qarşınızda elmi gəncliyin nümayəndəsi kimi çixiş etmişəm.

Sizdən həm ölkənin Birinci xanımı, həm Birinci Vitse-prezident, həm də alim kimi yardım istəyirəm. Əsassız olaraq, kiçik bir qrupun sabotajı nəticəsində işdən çıxarılıram. Elmər doktoru dissertasiyamın təqdimatı dövründə – 20 may 2022-ci il tarixində AMEA-nın rəhbərliyinə mənə qarşı sabotaj xarakterli ərizə təqdim olunmuşdur. Ərizənin təşkilatçıları şöbə müdiri Ələddin Məlikov və Magistratura sektorunun müdiri Qafil Dəmirov olub. Qafil Dəmirovun rəhbərlik etdiyi sektorun əməkdaşlarının imzaları təəccüb doğurur, mənim onlarla heç bir iş əlaqəsi yoxdur. Həmin sektorun ərizəyə imza atmayan nümayəndəsi də var. 08 iyul 2022-ci il tarixində elmlər doktoru dissertasiyasını müdafiə etdikdən sonra mənə qarşı olan hücumlar daha da kəskinləşdi. Yeğanə məqsədləri məni elmlər doktoru diplomumu almamış vəzifəmdən uzaqlaşdırmaqdır.

İşlədiyim müddət ərzində heç bir işçi tərəfindən mənim haqqımda şikayət ərizəsi verilməyib, xəbərdarlıq və töhmət almamışam, il boyu yaxşı işimə görə mükafatlandırılmışam. Ən böyük günahım odur ki, rəhbərlik etdiyim sektorda heç bir qanun pozuntusu etməyə imkan verməmişəm (ikinci ali təhsilimə görə hüquqşünasam).

AMEA-nın Doktoranturası olan 35 institutundan 31-i AMEA-nın prezidentinə rəsmi müraciət edərək, mənə dəstək olublar və bu məsələnin ədalətli həll olunmasını xahiş ediblər. Dəfələrlə Arif müəllimin qəbuluna düşmək istəsəm də, alınmadı. AMEA-nın 31 İnstitutunun rəyi nəzərə alınmadan mənə xəbər göndərildi ki “müdafiə edibsə, gedib institulardan birində elmlə məşğul olsun”.

Məcbur qalaraq, AR Prezidentinin Administrasiyasının Humanitar siyasət məsələləri şöbəsinin müdiri Fərəh xanım Əliyevanın qəbulunda oldum. Yalnız bundan sonra, 28 iyun 2022-ci il tarixində akademik Arif Həşimov məni qəbul edərək bildirdi ki, “Məndən Fərəh xanıma şikayət etmisən, bundan sonra Rəyasət Heyətində qalmayacaqsan, get şöbə müdirinə yalvar, etiraz etməsə, bəlkə müqaviləni uzadaram”. Deyəndə ki, axı məni 31 institut dəstəkləyir, yəni onların fikri önəmli deyil? Bu institutlara 7 vitse-prezidentin rəhbərlik etdiyi elmi müəssisələr də daxildir, mənə sarkazmla cavab verdi ki, “çox yaxşı, göndərərik, onlarla da işləyərsən”.

30 iyun 2022-ci il tarixində Təhsil şöbəsinin müdiri Ələddin Məlikova ərizəmi təqdim edib viza verməsini xahiş etdim. Mənə bildirdi ki, Arif müəllim icazə verərsə, viza qoyacağam. Həmən gün saat 11.00-da Ələddin müəllim məni çağırıb xəbərdarlıq etdi ki, “akademik Arif Həşimovla telefon danışığı olub və Arif müəllim ona viza qoymağı qadağan edib” (bu barədə Arif müəllimə yazdığım ərizənin surətini də əlavə edirəm).

Qeyd edim ki, AMEA Rəyasət Heyəti aparatı Təhsil şöbəsinin müdiri Ələddin Məlikov “elmlər doktoru” elmi dərəcəsi diplomu olmadığı halda özünü “fəlsəfə elmləri doktoru” kimi qələmə verir və bu təkcə AMEA-nın rəsmi saytında deyil, hətta AMEA-dan gedən rəsmi sənədlərdə belə öz əksini tapıb.

Çox hörmətli Mehriban xanım, işdən qanunsuz olaraq çıxarılsam da, bir alim olaraq Möhtərəm cənab Prezident İlham Əliyevin və Sizin siyasi kursunuzu hər zaman dəstəkləyəcək, Prezidentə sadiq böyük alimlər ordusunun sıravi əsgəri olacağam.

Dərin hörmət və ehtiramla,

Tubuxanım Elman qızı Qasımzadə,

AMEA Rəyasət Heyəti Təhsil şöbəsi Doktorantura sektorunun müdiri,

biologiya üzrə fəlsəfə doktoru, dosent”