Hadisə

“MTN-də dedilər ki, bura polis bölməsi deyil, 5 min təklif edirsən”

Ləğv edilmiş Milli Təhlükəsizlik Nazirliyinin (MTN) Baş İstintaq İdarəsinin sabiq rəisi, general-mayor Mövlam Şıxəliyev, onun müavini Yasin Məmmədov və idarənin şöbə rəisləri Vüsal Ələkbərovla Sahib Ələkbərovun cinayət işi üzrə məhkəmə prosesi davam etdirilir.

AzToday.az “qafqazinfo”ya istinadla xəbər verir ki, ötən prosesdə zərərçəkən Elvar Əliyevin ifadəsi üzrə şahid qismində Elman Əhmədov ifadə verib.

“Sədərək” bazarında sahibkarlıqla məşğul olan Elman Əhmədov bildirib ki, o Elvar Əliyevlə dostluq etdiyi üçün həbs olunub: “Mənim heç bir cinayətim yox idi. Onlar Elvar Əliyevi həbs etmişdilər. Mən də onunla dostluq etdiyim üçün heç bir cinayətim olmadan həbs olundum. 3 ay MTN-də qanunsuz saxlanıldım. Həmin müddətdə qardaşım oğlundan azad edilməyim üçün hədə-qorxu ilə 160 min manat alıblar. Azadlığa çıxandan 10 gün sonra müstəntiq Fuad mənə zəng elədi, MTN-ə çağırdı. Xidməti otağında bir nəfər də vardı. Əynindəki geyimindən bildim ki, prokurorluq işçisidir. Onun yanında Fuad mənə azadlığa çıxmağım üçün ödədiyim məbləği açıqlamağımı istədi. Söhbətdən belə anladım ki, Baş Prokurorluqla MTN arasında məndən alınan pulun bölgüsünə görə mübahisə yaranıb. Bunlar da məni çağırıb prokurorluq işçisinin yanında pulun məbləğini soruşur, özlərini təmizə çıxarırlar. Rəqəmi dəqiqləşdirəndən sonra Fuad mənə dedi ki, gedə bilərsən. Elvarın azad edilməsi üçün 80 min, Hacı Seyrandan 100 min, Natiqdən 250 min, Etibardan 209 min manat aldılar. O vaxt bizi həbs edərkən “Sədərək”də fəhlə işləyən Balaşirini də tutmuşdular. Bizim pulumuzu alıb girovluqdan azad edəndə Balaşirinin pulu olmadı. Buna görə də Balaşirini MTN-də 6 ay heç bir əsas olmadan girov saxladılar. Sonda gördülər ki, fəhlədir, pulu yoxdur, məcbur olub azad etdilər”.

Məhkəmədə dövlət ittihamçısı (prokuror) əli ilə öz mundirini göstərib şahidə “həmin şəxsin geyimi belə idi?” sualını verib. Elman Əhmədov geyimlərin eyni olduğunu təsdiqləyib.

Daha sonra zərərçəkmiş Rauf Həsənovun ibtidai istintaqa verdiyi ifadə elan olunub. Məlum olub ki, o qızıl alveri ilə məşğul olduğu üçün MTN tərəfindən telefonları dinlənilib. Daha sonra həbs edilərək buraxılması üçün 300 min dollar tələb olunub: “Pulu çətinliklə düzəldib verdim. Yarım saat sonra Yasin zəng etdi ki, 200 dollar çatmır. Çatışmayan 200 dolları tapıb verdim. MTN dağılandan sonra 300 min dolları qaytarıblar”.

Digər zərərçəkən Qulam Bağırov məhkəmədəki ifadəsində deyib ki, 2008-ci ildə tanışı Günayla Nigeriya vətəndaşlarına səyahət çekləri veriblər: “Sahib Ələkbərov MTN-də hədə-qorxu gələrək məni həbs edəcəyini bildirdi. 200 min manat pul tələb etdi. Dedim ki, evimdə 5 min var, o pulu verim. Sahib əsəbiləşərək “bura polis bölməsi deyil, bunu mənə təklif edirsən” dedi. Bundan sonra Sahib üzərinə mənim adım yazılmış CD-ni kompüterə daxil etdi. Mənim səs yazılarımı dinlətdi. Başa düşdüm ki, həqiqətən də MTN tərəfindən nəzarətdəyəm. O zaman “Azərtuneltikinti”nin İran üzrə filial müdiri idim. İranda keçiriləcək layihə ilə bağlı Astaraya gedərkən yolda məni MTN əməkdaşları saxladı. Bakıya gətirib həbs etdilər. Azadlığa çıxanda öyrəndim ki, qardaşım bunun üçün Sahibə 135 min dollar verib. Qardaşım faizə pul götürüb məni azad etdirmişdi. Faizə alınan pulları qaytara bilmədiyimizə görə qardaşım həbs olundu. 3 il 8 ay həbsdə qaldı. Anam dünyasını dəyişdi. MTN binasına gedib Sahib Ələkbərovla görüşdüm. Səs-küy düşdü. Dedim ki, pulu qaytar, məni həbs elə. Sahib Ələkbərov and içdi ki, “pulun “loşadinıy” dozası – 80 min dolları Mövlam Şıxəliyevə çatıb. 20 min dolları mənim əziyyət pulumdur, 10 min dolları ekspertə vermişəm”. Dedilər ki, “camaat bura 1 milyon dollar pul verir, səsi çıxmır. 100 min pul vermisən, səsin buraları götürüb”. Məni MTN binasından çölə çıxardılar”.

Proses mayın 10-da davam etdiriləcək.

Qeyd edək ki, Mövlam Şıxəliyev MTN-də İstintaq Baş İdarəsinin rəisi vəzifəsində çalışdığı 2008-2014-cü illərdə qeyd edilən qurumun tərkibindəki şöbənin sabiq rəisi Vüsal Ələkbərov, İbtidai istintaq idarəsinin sabiq rəis müavini Yasin Məmmədov, şöbə rəisinin sabiq müavini Sahib Ələkbərovla mütəşəkkil dəstə tərkibində iş adamlarından hədə-qorxu yolu ilə külli miqdarda pul tələb etməkdə ittiham olunur. İstintaqla M.Şıxəliyevin mütəşəkkil dəstə halında ümumilikdə 14 milyon 292 min manat rüşvət qismində, 5 milyon 77 min manat məbləğində özgə əmlakını hədə-qorxu ilə tələb edib almasına əsaslı şübhələr müəyyən edilib və barəsində həbs qətimkan tədbiri seçilib. Cinayət işi üzrə 32 zərərçəkmiş var.

Bənzər yazılar

Back to top button