“Bərbad siyasət hər gün artan qiymətlər fonunda daha da eybəcər xarakter alır” – Elxan Şükürlü

“Qazaxıstanda – Putinin “Yeni SSRİ”ni qurmaq istədiyi əsas ölkələrdən birində qiymət artımına etirazla başlayan və getdikcə genişlənən kütləvi aksiyalardan Azərbaycan hakimiyyəti də çox ciddi nəticə çıxarmalı, həmişəki arxayınlığını, nəhayət, bir kənara tullamalıdır”.

Bu barədə açıqlama ilə siyasi şərhçi Elxan Şükürlü çıxış edib.

E.Şükürlü bildirib ki, bizim hakimiyyət nə qədər cəmiyyətin müqavimət potensialının aşağı həddinə və Qarabağdakı qalibiyyətlə ictimai reytinqini yüksəltdiyinə arxayın olsa da, ölkədə yürüdülən bərbad sosial-iqtisadi siyasət hər gün artan qiymətlər fonunda daha eybəcər xarakter alır və bu durum istənilən xarici qüvvənin ölkəni içdən rahatca qarışdırmaq imkanlarını artırır!

“Sosiologiya elmi çoxdan sübut edib ki, bizim kimi mütəhərrik və kənar təsirlərə açıq cəmiyyətlərdə siyasi proseslərin latent inkişafı müayinəyə getməyən kasıb insanın orqanizmindəki xərçəng xəstəliyinə çox bənzəyir – bir də gözünü açırsan ki, hər şey gecikib, heç bir addımın faydası yoxdur!

Odur ki, hakimiyyət arxayınlığını bir kənara atıb, gecikmədən “cərrahi müdaxilə”yə – sürətli iqtisadi-siyasi islahatlara əl atmalı, ölkənin xaricindəki düşmən niyyətli güclərlə daxilindəki sabotajçıların əlbir hərəkətinə – sosial zəmində narazı kəsimdən istifadəsinə imkan yaratmamalı, xalqla real yaxınlaşma kursu seçməlidir!”, – deyə siyasi şərhçi əlavə edib.

Onun sözlərinə görə, unudulmamalıdır ki, kiçik bir yanlışlıq və arxayınçılıq öyündüyümüz Qarabağ zəfərini də tamamilə əlimizdən ala, heçə-puça çevirə bilər!:

“Zamanında özün gərəkli cəsarətli addımları atmalısan ki, ya kütlə təhrikiylə geri çəkilmək, ya da kütləyə atəş açmaq məcburiyyətində qalmayasan!”(XəzərNews.az)