Aprelin 7-də Milli Məclisin iclasında spiker Sahibə Qafarova İran parlamentini Azərbaycana qarşı təxribatlara son qoymağa və ikitərəfli münasibətlərə xələl gətirən hərəkətlərdən çəkinməyə çağırıb.
“Azərbaycan müstəqil dövlətdir və kiminlə münasibət quracağına özü qərar verir. Bu, onun daxili işidir və heç kimin müdaxilə etmək hüququ yoxdur. Biz İran parlamentinin ölkəmizə qarşı irəli sürdüyü əsassız ittihamları qəti şəkildə rədd edirik, Tehranı ikitərəfli münasibətlərə xələl gətirən bu təxribatlara son qoymağa çağırırıq”, – o deyib.
Öz növbəsində, Milli Məclisin vitse-spikeri Fəzail İbrahimli İranı “islam dünyasına xəyanət edən” ölkə adlandırıb. O, İran parlamentinin bəyanatını “yalan və riyakarlıq”adlandırıb.
Deputat Nizami Cəfərov İran hakimiyyətini etnik azərbaycanlıların hüquqlarını pozmaqda ittiham edib.
“İran bizim İsraillə münasibətlərimizə müdaxilə etməməlidir. Azərbaycan digər ölkələrlə münasibətlər qurarkən heç kimlə məsləhətləşməyəcək. İsrail tərəfindən dostluq, İran tərəfindən isə xəyanət gördük”, – o deyib.
Musa Quliyev bildirib ki, Azərbaycanın İsraildə səfirlik açmasına İran parlamentinin etirazı heç bir siyasi-diplomatik etikaya sığmır.
“Dünən İranın 4 diplomatı casusluğa görə arzuolunmaz şəxs elan edilib. Düşünürəm ki, qalan işçilər də ölkəni tərk etməlidir və səfirlik adlı casus və intriqa yuvası bağlanmalıdır”, – o əlavə edib.
Çıxışların yekunlarına əsasən cavab bəyanatı qəbul edilib. Bəyanatda deyilir ki, Azərbaycan Milli Məclisi İran parlamentinin 5 aprel tarixli bəyanatını Azərbaycan dövlətinin daxili işlərinə müdaxilə kimi qiymətləndirir.
“Bu, İran tərəfinin Azərbaycana qarşı növbəti siyasi təxribatıdır. 30 ilə yaxındır ki, İran Ermənistanın Azərbaycanın beynəlxalq səviyyədə tanınmış ərazilərini işğal etməsinə göz yumur, hətta tez-tez təcavüzkarı dəstəkləyib. Torpaqlarımız azad edildikdən sonra İkinci Qarabağ Müharibəsi zamanı İran Azərbaycana qarşı açıq hərəkət etməyə başlayıb”, – sənəddə deyilir.
Sərhəddəki hərbi təlimlər, Azərbaycanın Tehrandakı səfirliyinə qarşı terror təxribatları, 10 min azərbaycanlının zorla qovulduğu Ermənistanın Qafan şəhərində İran konsulluğunun açılması, Təbrizdə Ermənistanın Baş Konsulluğunun açılması, Azərbaycanın Ermənistanla münasibətlərinin normallaşmasına mane olmaq cəhdləri və digər bədxah əməllər bir zəncirin halqalarıdır.
«Azərbaycanda İranın xüsusi xidmət orqanları tərəfindən yaradılmış casus şəbəkəsinin ifşası və adamları yalan təbliğatla radikal dini ideyalar ətrafında birləşdirmək cəhdləri ciddi narahatlıq doğurur.
İsraildə səfirliyin açılması Azərbaycanın suveren hüququdur və bu barədə əsassız ittihamlar qəbuledilməzdir.
İsraildə digər müsəlman ölkələrin: Mərakeş, Çad, Bosniya və Herseqovina, Qazaxıstan, Özbəkistan, Türkiyənin diplomatik missiyaları fəaliyyət göstərir.
Azərbaycan həmçinin Fələstində diplomatik nümayəndəlik açıb. Azərbaycan hər zaman Fələstin məsələsində həmrəylik nümayiş etdirib, İsrail-Fələstin münaqişəsinin iki dövlət prinsipi əsasında həllini dəstəkləyib və bu mövqeyi beynəlxalq təşkilatlar çərçivəsində nümayiş etdirib.
“Azərbaycan Milli Məclisi İran tərəfinin Azərbaycana qarşı müntəzəm fəaliyyətini qətiyyətlə pisləyir və rədd edir, ondan bizim ölkəmizə qarşı yolverilməz hərəkətlərin dayandırılmasını tələb edir”, – bəyanatda vurğulanır.
