Xarici işlər nazirləri Ceyhun Bayramov və Ararat Mirzoyan ABŞ- da danışıqları yekunlaşdıraraq “sülh haqqında ikitərəfli saziş layihəsinin bəzi maddələri və dövlətlərarası münasibətlərin qurulması üzrə qarşılıqlı razılıq əldə ediblər, eyni zamanda, bəzi əsas məsələlər üzrə mövqelərin fərqli olaraq qaldığını etiraf ediblər”, – Azərbaycan Xarici İşlər Nazirliyi bildirib.
Milli Məclisin deputatı Rasim Musabəyov Amerikadakı danışıqlardan sonra sənədləşdirilmiş razılaşmanın olmamasını Rusiyanın Yerevana təzyiqilə izah edib. “Vaşinqtondakı danışıqlarda Ermənistan öz tələblərinə israr edib və Azərbaycanla sazişin paraflanmasını pozub. Danışıqların Moskvada davam etdiriləcəyi elan edilib. Təşviq oradan gəlib. Stavropol diyarında magistral qaz kəmərinin təmiri başa çatıb və mayın 1-də Ermənistana nəqli dayandırılmış qaz tədarükü bərpa edilib”.
Deputat həmçinin Vaşinqtonda nazirlərin görüşləri zamanı dayandırılmış “Lars” keçidi vasitəsilə ermənilərin kənd təsərrüfatı məhsullarını daşıyan yük maşınlarının buraxılmasına başlanılması şəklində Kremlin həvəsləndirici jestini gözləyir.
Ermənistanda növbəti, hətta Moskva mərhələsində belə danışıqlar prosesində irəliləyiş gözləmirlər. Politoloq Suren Surenyansın sözlərinə görə, hakimiyyətin reytinqi tarixi minimuma çatıb, Paşinyan hər hansı sənədin imzalanmasından qaçmaq üçün hər şeyi edəcək, “çünki bilir ki, danışıqların Moskva, Vaşinqton və ya Brüsseldə olub-olmamasından asılı olmayaraq, istənilən sənəd Ermənistanın maraqlarına uyğun ola bilməz”.
“Baş nazir bilir ki, hər hansı Ermənistan-Azərbaycan sənədi imzalanandan sonra həll olunmayan daxili siyasi problemlərlə üzləşəcək. Ölkədə sarsıntılar ola bilər. Üstəlik, hakimiyyət dəyişikliyinə qədər, çünki erməni cəmiyyətinin böyük hissəsi ona etibar etmir. Ancaq başa düşmək lazımdır ki, Paşinyanın resursları sonsuz deyil. Nəhayət, o, geosiyasi mərkəzlər arasında seçim etmək məcburiyyətində qalacaq. Hakimiyyət özünü dalana dirəyib”, – Surenyans deyib.(Turan)
