ABŞ Senatı bir ildir ABŞ-ın Azərbaycandakı səfirinin namizədliyinin təsdiq edilməsini ləngidir

Dövlət Departamenti Azərbaycanda səfir vəzifəsinə irəli sürülmüş namizədin, nəhayət ki, təsdiq ediləcəyini gözləyir, belə ki, prezident Baydenin səfirin namizədliyini irəli sürməsindən bir il keçib.

Ağ Ev əvvəlki kimi namizədliyinin təsdiq edilməsi bir ildir Senatın xarici işlər komitəsində təxirə salınan karyeralı diplomat Mark Libbinin Azərbaycanda səfir olmasını istəyir.

Hazırda Vaşinqtonda Milli Hərbi Kollecdə Dövlət Departamenti fakultəsinin müşaviri vəzifəsində işləyən Libbi hələ Senatın ABŞ-ın erməni lobbisi ilə möhkəm əlaqələri ilə məşhur olan senator Bob Menendesin rəhbərlik etdiyi komitəsində dinləmələrdən keçməyib.

“Biz bütün namizədlərimizin tez təsdiq edilməsini dəstəkləyirik və bu məsələ ilə bağlı hər hansı əlavə sualınız varsa, onları Senata ünvanlamalısınız”, deyə Dövlət Departamentinin rəsmi nümayəndəsi Metyu Miller Turan-ın müxbirinin Libbinin taleyi haqqında sualına cavabda bildirib.

Öz növbəsində, Senatın xarici işlər komitəsinin nümayəndəsi Mark Libbinin təsdiq edilməsi haqqında sorğuya cavab verməyib.