Dünya

Ağ Evdən oğurlanmış ukraynalıların Rusiyada övladlığa götürülməsinə münasibət

Birləşmiş Ştatlar Rusiyanın övladlığa götürmə saytlarında Rusiyanın oğurlanmış ukraynalı uşaqların siyahılarını yerləşdirməsi ilə bağlı yeni və təsdiqlənmiş məlumatlardan xəbərdardır.

Qaynarinfo xəbər verir ki, bunu ABŞ prezidentinin milli təhlükəsizlik üzrə müşaviri Ceyk Sallivan deyib.

O, Rusiyanın hərəkətlərini “iyrənc və dəhşətli” adlandırıb.

Sallivan qeyd edib ki, Ukraynaya genişmiqyaslı müdaxilə başlayandan bəri Rusiya rəsmiləri “ailələrindən zorla ayrılmış uşaqlar da daxil olmaqla” yüz minlərlə ukraynalı mülki vətəndaşı Rusiya Federasiyasına deportasiya edib.

ABŞ prezidentinin müşaviri vurğulayıb ki, ukraynalı uşaqlar ailələrinin yanında olmalıdırlar. Onun sözlərinə görə, ruslar “təkcə Ukrayna hərbçilərinə qarşı deyil, həm də Ukrayna xalqına qarşı müharibə aparır”.

“Rusiya Ukraynada hərbi cinayətlər və insanlığa qarşı cinayətlər törədir. Biz Ukrayna xalqının yanında olmağa davam edəcəyik, onlara vəhşi işğalçı müharibədən qorunmağa kömək edəcəyik”, – deyə Sallivan bildirib.

Xatırladaq ki, Britaniyanın “Financial Times” (FT) qəzetinin jurnalistləri Rusiya hakimiyyətinin Rusiya qoşunlarının ölkəyə genişmiqyaslı müdaxiləsinin ilk aylarında Ukraynadan oğurladığı, sonra isə onları övladlığa götürməyə verdiyi dörd uşağın şəxsiyyətini və harada olduğunu müəyyən edib.

Söhbət səkkiz yaşından 15 yaşa qədər olan uşaqlardan gedir, onların şəxsiyyətləri Ukrayna hakimiyyətinə ailələri tərəfindən təsdiqlənib. Onların adları göstərilmir. Nəşr iddia edir ki, müharibənin əvvəlində bu uşaqlar Ukraynanın cənub və şərq vilayətlərində yaşayıb, Rusiya işğalından sonra isə Ukrayna uşaq evlərindən “oğurlanıb”, həmçinin “qəyyumlarından və qohumlarından ayrılıblar”. İndi onlar Tula və Orenburq vilayətlərində yerləşirlər. Bir uşaq Rusiyanın ilhaq etdiyi Krıma aparılıb.

Jurnalistlər valideynlik himayəsindən məhrum olanlar haqqında məlumat bankının yerləşdiyi Rusiyanın “Usınovite.ru” layihəsinin saytında dörd azyaşlının fotoşəkilləri olan profillər tapıblar. FT qeyd etdiyi kimi, layihə Rusiya hakimiyyəti ilə bağlıdır. Anketdə bir uşaq yeni rus adı ilə təqdim olunur və onun yaşı dəyişdirilib. Daha bir azyaşlının adı rus dilinə tərcümə edilib. Eyni zamanda, onların heç birinin profillərində ukraynalı olması barədə heç bir qeyd yoxdur.

Bənzər yazılar

Back to top button