Göyçayın baş baytarının bitib-tükənməyən qanunsuzluqları…

Rayonda süd-qatıq satanlara qənim kəsilən Ağadadaş Hacıyevin leş ətlərə möhür vurduğu iddiası var – sensasion məlumatlar

Göyçayın baş baytarı Ağadadaş Hacıyevın rayon bazarında təbii süd və süd məhsullarının satışını qadağan etməsi haqda yazmışdıq. Məmurun bu əməli rayonda qatıq, şor qıtlığı yaradıb, süd və süd məhsulları istehsal edən aztəminatlı ailələri yeganə gəlir mənbəyindən məhrum edib. Bu haqda xəbərlər ictimailəşəndən sonra baş baytarın hüquq-mühafizə orqanları tərəfindən araşdırılması zəruri olan fəaliyyəti barədə məlumatlar üzə çıxıb. Mətbuatda dərc olunmuş yazılarda iddia olunur ki, A.Hacıyev vəzifə səlahiyyətlərindən sui-istifadə edib öz şəxsi maraqlarına görə qanunsuz və qərəzli olaraq 15 il qanuni fəaliyyət göstərən, 3 ailənin yeganə qazanc yeri olan baytarlıq aptekini bağlatdırıb.

Məmurun bu addımı təsadüfi deyilmiş. Onun Göyçay rayon ərazisində çoxlu sayda baytarlıq apteki var. Həmin apteklər hamısı tam qanunsuz fəaliyyət göstərir.

Ağadadaş Hacıyevin Orxan adlı oğlunun adı Göyçay rayon Baytarlıq Xidməti İdarəsində işçi kimi qeyd edilsə də, o, rayon mərkəzində baytarlıq apteki işlədir, ancaq onun baytar ixtisası yoxdur. Göyçay rayonu, Nizami küçəsi ərazisində yerləşən baytarlıq aptekini Nuru adlı qaynı işlədir ki, onun da baytarlıq ixtisası yoxdur. Göyçay rayonunda paltar bazarının yaxınlığındakı aptek də qanunsuz fəaliyyət göstərir. A.Hacıyevin qardaşı Qiyas Hacıyevə məxsus olan Göyçay rayonu R.Rza küçəsi və “kolxoz bazarı” ərazisində yerləşən baytarlıq apteklərində də baytarlıq ixtisası olmayan şəxslər işləyir ki, bu ciddi qanun pozuntusudur, saxtakarlıqdır.

Ulus.az xəbər verir ki, Qiyas Hacıyevə məxsus Ucar rayonu Müsüslü kəndində yerləşən quşçuluq broylerində antisanitariya, qanunsuzluq baş alıb gedir. A.Hacıyevin Rahim adlı qaynına məxsus Göyçay rayonunda qırmızı körpünün yaxınlığındakı ət kombinatında xəstə mal-qara kəsilərək birbaşa satış nöqtələrinə gətirilir və möhür də bazarda vurulur. Hansı ki, qanuna əsasən mal-qara kəsilərkən elə oradaca lobarator analiz edilib, möhür vurulub sonra satış nöqtələrinə paylanmalıdır.

“Bütün bunlar Göyçay Rayon Baytarlıq Xidməti rəisinin vəzifə səlahiyyətlərindən sui-istifadə edib yaratdığı korrupsiya şəbəkəsinin nəticəsidir.

O, Göyçay rayonunda baytarlıq xidmətini tam inhisarına alıb özbaşınalıqla, saxtakarlıqla məşğuldur ki, bu cinayət əməlidir.

A.Hacıyev Göyçay rayonunun mərkəzində, Qarabaqqal və Çayarxı kəndlərində möhtəşəm villaları, konyak zavodunun yaxınlığında böyük ticarət obyektini, İsmayıllı rayonunda 1000 başdan çox qoyun sürüsü olan fermasını, 100 hektarlarla torpaq sahələrinin hamısını çirkli pullarla əldə edib” – deyə sayt yazır.

P.S Qarşı tərəfi də dinləməyə, mövqeyini dərc etməyə hazırıq.

Müsavat