Suriyada ötən ay 334 mülki vətəndaş öldürülüb

Suriya İnsan Haqları Şəbəkəsi ötən ay 334 mülki vətəndaşın qətlə yetirildiyini açıqlayıb.

Qaynarinfo xəbər verir ki, öldürülənlərdən 87-si uşaq, 63-ü qadındır. Bəşər Əsəd rejimi 24 uşağı, 13 qadını qətlə yetirib. 9-u uşaq, 1-i qadın olmaqla 18 nəfər YPG/PKK terror təşkilatı tərəfindən tələf edilib. İŞİD terror təşkilatı 1-i uşaq olmaqla 28 mülki vətəndaşı, İŞİD əleyhinə yaradılmış və ABŞ-ın rəhbərlik etdiyi koalisiya qüvvələri 1 uşaq, 1 qadın və digər 7 nəfəri qətlə yetirib.

Qeyri-müəyyən qüvvələr isə ümumilikdə 119 mülki vətəndaşın ölümünə səbəb olub. Bunlardan 36-sı uşaq, 40-ı qadındır.

Öldürülənlərdən 2-si media nümayəndəsi, 2-si isə humanitar fəaliyyətlə məşğul şəxslər olub.

Hökumət qüvvələri mart ayında 26 nəfərə, YPG/PKK terror təşkilatı 2, digər qüvvələr isə 2 nəfərə işgəncə verərək öldürüb.

Qeyd edək ki, Suriyada bu ilin yanvar ayında 196, fevral ayında isə 246 mülki vətəndaş qətlə yetirilib.