Müxalifət niyə bir araya gələ bilmir? – Partiya liderlərinin cavabları

Yeni Azərbaycan Partiyasının son qurultayında 5 siyasi təşkilat hakim partiyaya birləşdi. Müxalifət düşərgəsində isə birləşmə ilə bağlı hansısa hərəkətlənmələrin olması ilə bağlı partiya sədrlərinin münasibətini öyrəndik:

Xalq Partiyasının sədri Pənah Hüseyn Qaynarinfo-ya açıqlamasında bildirib ki, hazırda müxalifətdaxili münasibətlərdə durğunluqdur:

“Əksinə, yeni siyasi partiyalar yaranır. 10-dan çox partiya qeydiyyata alınıb. Prezident Adminstrasiyası ilə partiyalar arasında müəyyən proseslər gedir, partiyalara qərargahlar verilir. Hazırda partiyaların birləşməsi yox, yeni partiyalaşma prosesi müşahidə olunur. Hansısa partiyaların bir-birinə birləşməsi və ya inteqrasiyası ilə bağlı məndə informasiya yoxdur. Normal siyasi proses istiqamətindən danışsaq, azad və ədalətli seçki prosesi olsa, bu halda partiyalar arasında inteqrasiya, hətta birləşmə prosesi də gözlənilə bilər. Burada müxalifəti nəzərdə tuturam. Çünki seçkidə normal iştirak eləmək üçün qüvvələri birləşdirmək lazım gəlir. Hazırda belə bir situasiya da yoxdur. O baxımdan, proses görünmür. Amma müəyyən təşəbbüslər var ki, müxalifət partiyaları arasında (iqtidara loyal və ya radikal olmasından asılı olmayaraq) arzuolunan qüvvələrin məsləhət və məşvərət, fikir mübadiləsinə daimi imkan verən bir təsisatı olsun. Bu da hələlik bir təşəbbüsdür, baş tutub-tutmayacağı yəqin məlum olar”.

Müsavat partiyasının sədri Arif Hacılı gerçək müxalif partiyaların təmərküzləşməsini vacib sayır:

“Gerçək müxalifət partiyaları arasında əməkdaşlıq münasibətləri var. Bəzi müxalifət partiyaları arasında normal və qarşılıqlı münasibətlər sistemi formalaşıb. Hansısa partiyaların bir-biri ilə birləşməsi ilə bağlı hər hansı bir məlumatım yoxdur. Əslində siyasi qüvvələrin birliyi dedikdə siyasi təşkilatların birləşməsi yox, daha çox onların birgə fəaliyyəti nəzərdə tutulmalıdır. Söhbət iqtidarın nəzarətində olan müxalifət partiyalarından yox, gerçək müxalifətdən gedir. Gerçək müxalifət partiyaları arasında iş birliyinin və əməkdaşlığın olması zəruridir. Arzuolunan səviyyədə olmasa da, gerçək müxalifət partiyaları arasında əməkdaşlıq mövcuddur”.

Demokrat Partiyasının sədri Sərdar Cəlaloğlu müxalifətin bir araya gələ bilməməsinin səbəblərinə toxunub:

“Partiyaların birləşməsi və təmərküzləşməsi vacib və zəruridir. Siyasi partiyaların dağınıqlığı siyasi nəticələr əldə olunmasına ciddi mane olur, ümumi çaşqınlıq yaradır. Onsuz da Azərbaycanda bu qədər siyasi partiyanın olmasına ehtiyac da yoxdur. Ən yaxşı halda Azərbaycanda 3-4 partiya olmalıdır. Ona görə mənə elə gəlir ki, süni demokratiyadan sui-istifadə kimi meydana çıxan partiyaların fəaliyyətinə son vermək lazımdır. Həm iqtidar, həm də müxalifət partiyaları təmərküzləşməlidir. Bu gün iqtidardan bəhrələnən və İlham Əliyevi tərifləyən partiyaların fəaliyyətinin nə mənası, nə məntiqi var. Eləcə də ümumi dəyərləri bölüşdürən müxalif təşkilatların ayrı-ayrı partiyalar şəklində olmasının heç bir mənası yoxdur. Bu baxımdan, düşünürəm ki, ölkədə siyasi inkişaf istəyiriksə, mütləq yalançı çoxpartiyalılıqdan real çoxpartiyalılığa keçid eləmək lazımdır. Hazırda müxalifət düşərgəsində təmərküzləşmə ilə bağlı heç bir cəhdlər yoxdur. Partiyalar birləşən zaman bir-birinə güzəştlər edə bilməlidir…”