Həbsdə olan holdinq sahibi istintaqın 5 ilə yaxın uzanmasından narazıdır (MÜRACİƏT)

Hazırda həbsdə olan "KAT HOLDİNG”  MMC-nin təsisçisi Elçin Ələkbərov 5-ci ildir ki, davam edən istintaq-məhkəmə prosesslərinin gedişatından narazılıq ifadə edərək,  Azərbaycan Respublikasının Ali Məhkəməsinin Sədri cənab İnam Kərimova, Bakı Apellyasiya Məhkəməsinin Sədri cənab Mübariz Əkbərova və KİV-ə müraciət ünvanlayıb.

Qaynarinfo redaksiyaya daxil olan müraciəti kiçik ixtisarla dərc edir:

"Baş Prokurorluq tərəfindən bir daha bildirilir ki, məhz mənzillərlə təmin edilməyən bir çox vətəndaşın, eləcə də Litva Respublikasının vətəndaşı Pocius Povilasın 10 iyun 2020-ci il tarixli, həmçinin binaların tikintisini sifariş edən "MİDA” MMC-nin 12 iyun 2020-ci il tarixli müraciətləri əsasında aparılan araşdırma nəticəsində Baş prokuror yanında Korrupsiyaya qarşı Mübarizə Baş İdarəsində 16 iyul 2020-ci il tarixdə cinayət işi başlanıb. İstintaq gedişatında toplanmış sübutlara əsasən Elçin Ələkbərov Cinayət Məcəlləsinin müxtəlif maddələri ilə təqsirləndirilən şəxs qismində cəlb olunmaqla barəsində məhkəmənin qərarı ilə həbs qətimkan tədbiri seçilib.

Mən, Ələkbərov Elçin Bəşir oğlu "KAT HOLDİNG”  MMC-nin təsisçisi - 30.07.2020-ci tarixdə barəmdə Azərbaycan Respublikası Baş Prokuror yanında Korrupsiyaya qarşı Mübarizə Baş İdarəsi cinayət işi qaldırıb və həbs olunmuşam. 2 ilə yaxın aparılan istintaqın nəticəsində müəyyən edilib ki, guya mən həmin cəmiyyətin direktoru Mayil İbadov ilə cinayət əlaqəsinə girərək cəmiyyətə məxsus olan 2 binadakı mənzillərdən 34 ədədini 1.900.128.68 manata satıb, onun 330.724 manatını cəmiyyətin müxbir hesabına köçürüb, qalan 1.563.404.68 manatını birlikdə bölüb öz "ehtiyacımıza” sərf  edib, bununla da AR CM-nin 179.4-cü maddəsi ilə nəzərdə tutulan cinayət əməlini törətmişik.

Bir ilə yaxın iş Bakı Ağır Cinayətlər Məhkəməsində araşdırıldıqdan sonra 12 dekabr 2022-ci il tarixli hökmü ilə məhkəmə bizim bu "cinayət əməllərimizi” ayrı-ayrılıqda CM-nin 179.4 və 308.2-ci maddələrindən həmin məcəllənin 313-cü maddəsinə tövsüf edib CM-nin 42.2.1-ci maddəsinə əsasən bizə cəza təyin etməyərək göstərmişdir ki, həmin mənzillərin satışından əldə olunan pullar tərəfimizdən mənimsənilməyib, onlar tikinti işlərinə yönəldilmişdir.

Göstərilən hökmdən bizə bəraət verilməsi, "zərərçəkmiş” Litva vətəndaşı Pocius Povilas və prokuror vasitəsi ilə barəmizdə CM-nin 179.4-cü maddəsi ilə 14 ilə qədər azadlıqdan məhrum olunmağımız üçün apellyasiya şikayətləri və protest verilmişdir.

İşin baxışına 2023-cü ilin yanvar ayından başlansa da, Bakı Apellyasiya Məhkəməsi nəinki onu yekunlaşdırır, hələ 13.08.2024-cü il tarixli qərarı ilə "zərərçəkmiş” P.Povilasın və prokurorun vəsatətləri əsasında təkrar (bundan əvvəlki ekspertizanın keçirilməsinə 6 ay vaxt sərf edilmişdir) kompleks məhkəmə-texniki və əmtəəşünaslıq ekspertizası təyin etdi. 

Baxmayaraq ki, qaldırılan sualların hamısının cavabı işin materiallarında var və məhkəmədə o mənasız vəsatətləri işin baxılmasının uzadılması kimi qiymətləndirib AR CPM-nin 397.4-cü maddəsinə əsasən rədd etmək əvəzinə təmin etdi. 

İlk baxışdan prokuror və hakimlər bilikli, profesional, öz işlərini bilən yüksək ixtisaslı hüquqşünaslar təsiri bağışlasalar da, bizə qarşı sürülən CM-nin 179.4-cü maddəsində P.Povilasın CPM-in 87-ci maddəsinə uyğun olaraq zərərçəkmiş şəxs qismində tanınmadığı halda məhkəmə nəyinki apellyasiya şikayətini qanunsuz olaraq baxışa təyin etmişdir, hələ üstəlik indi də onun yuxarıda göstərilən (güman ki, xüsusi tapşırıq əsasında) vəsatətini təmin etdi. 

Maraqlıdır: Mən öz vəsaitim hesabına tikdirdiyim 3 yaşayış binamdan birini -12 mərtəbəli 60 mənzildən ibarət tam təmirli və mətbəx mebeli ilə təmin olunmuş  (3.526.527 manata başa gələn) 27 saylı binamı müvafiq dövlət qurumunun sərəncamına təmənnasız verməyimi prokurorluq cinayət hesab etmir, amma digər 2 binamdakı mənzillərimdən 34 ədədini satdırdığıma görə (baxmayaraq ki, alınan vəsait bilavasitə tikintiyə yönəlmişdir)  hər birimizə 14 ilə qədər azadlıqdan məhrum etmə cəzasını tələb edir.

Məhkəmənin "ittihamımıza” heç bir aidiyyatı olmayan qərarındakı göstərişlərin, yəni (2017-ci ilin oktyabr ayından 5 mart 2020-ci il tarixədək olan müddətdə tikintidəki ofis xidməti və işçilərə, mühəndis-fəhlə heyətinə, texnika, avadanlıq və qurğuların icarəsinə və ümumiyyətlə 27, 28, 29 saylı binaların inşaasına çəkilmiş real ümumi xərclərin və mal-materialların alınmasını təsdiq edən sənədlərin mövcudluğunu, onların qaydada aparılıb-aparılmamasını, binalardakı bütün mənzillərə  baxışın keçirilməsinə 5 mart 2020-ci il tarixdən indiyə kimi aparılan tikinti-təmir işlərinin müəyyən olunmasına 200-ə yaxın mənzillərdə baxışın keçirilməsinə və s. və i.) bütün bunların araşdırılıb müəyyən edilməsi üçün nə qədər vaxt sərf edilə biləcəyini təsəvvürümə gətirə bilməsəm də, qərarda göstərilən "AR CPM-nin 140.0.1-140.0.4-cü maddələrində nəzərdə tutulmuş halların - yəni cinayət işində ölənin və yaxud psixi xəstəlikdən əziyyət çəkən şəxsin müəyyən edilməsinə”- mən hiss edirəm ki, bax buna çox vaxt lazım gəlməyəcək. 

Belə ki, 10 milyon manat öz pulumu xərcləyib, tikdirdiyim 3 binadan birini də müvafiq dövlət orqanına hədiyyə verdiyim halda mən özgə əmlakını talamaqda ittiham edilərək 14 il müddətinə azadlıqdan məhrum olunmam tələbi az imiş kimi, hələ CM-nin 178.4-cü və s. maddələri ilə 10 il 06 ay müddətinə azadlıqdan məhrum edilmişəm. Guya  2017-2018-ci illərin ayrı-ayrı tarixlərində bir neçə dəfəyə Bakı şəhəri, Nərimanov rayonundakı Bankın qarşısında P.Povilasın 2.020.745 ABŞ dollarını dələduzluq yolu ilə ələ keçirib ona xüsusilə külli miqdarda ziyan vurmuşam. Bu barədə P.Povilasın özünün nə müraciəti, nə izahatı, nədə ki, ifadəsi cinayət işinin materiallarında yoxdur. Üstəlik də "pulu mənə şəxsən, əlbəəl verdiyi” günlərin bir neçəsində P.Povilasın özü heç Azərbaycan Respublikasının ərazisində olmamışdır. 

Görünür bu dünyada insanları kimliklərindən asılı olmayaraq həqiqətən də birləşdirən  ümumi maraqlarıdır. 

Belə ki, P.Povilas xüsusi canfəşanlıq edərək çalışır ki, (maraqlı və təəcüblüdür ki, o bütün istəklərinə nədənsə bir qayda olaraq nail olur?!) hələlik işin mahiyyəti üzrə baxılması uzadılsın. Qorxur ki, onun Azərbaycan Respublikasına 2 milyon dolları hansı yollarla gətirilməsinin üstü açılmaqla bərabər, həm də bilə-bilə bizə qarşı böhtan atdığına görə cinayət məsuliyyətinə cəlb edilə bilər.  Ümid edir ki, məni şərləyib, tutdurub 14 ilə qədər azadlıqdan məhrum etdirsə, mən - müxtəlif ağır xroniki xəstəliklərdən əziyyət çəkən şəxsin yaşaması uzun çəkməyəcək və o da "KAT Holding” MMC-yə yiyələnəcək. 

Hesab edirəm ki, prokurorluq orqanları qaldırdıqları cinayət işinin ağır nəticələr doğuracağını diqqətə almalıdır.

Məhkəmə- bəraət hökmü çıxarsa qisas, ittiham hökmü çıxarsa cəza obyektinə çevrilə biləcəyindən ehtiyyat edib müxtəlif gülünc, qanunsuz ekspertizalar təyin etməklə işin mahiyyəti üzrə baxılmasını qəsdən uzadır.  

Barəmizdəki - 2 təqsirləndiriləndən, 1 nəfər zərərçəkən şəxsdən, 2 epizoddan ibarət cinayət işinin araşdırılması ilə azı 10-15 müstəntiq, bir o sayda prokurorun, 30-a yaxın hakim və vəkilin, tərcüməçilərin, texniki işçilərin və s. iştirakı ilə 5-ci ildir ki, istintaq-məhkəmə prosessləri  hələ də davam edir və yaxın illərdə onun yekunu da görünmür.  

Belliklə, əsassız, qanunsuz ittihamlar, məhv edilən talelər, dağılan ailələr və onların gələcəkləri 1001 əziyyətə düçar olunmuş üzvləri...

P.S. Qanun, onun qərəzsiz tətbiqi budursa onda zülm və işgəncə vermək üçün istifadə olunan alətlərin adları nədir?!!!"

Qeyd edək ki, 2021-ci ilin fevral ayında Baş Prokurorluq tərəfindən verilən açıqlamada bildirilirdi ki, bir çox vətəndaşın, eləcə də Litva Respublikasının vətəndaşı Pocius Povilasın 10 iyun 2020-ci il tarixli, həmçinin binaların tikintisini sifariş edən "MİDA” MMC-nin 12 iyun 2020-ci il tarixli müraciətləri əsasında aparılan araşdırma nəticəsində Baş prokuror yanında Korrupsiyaya qarşı Mübarizə Baş İdarəsində 16 iyul 2020-ci il tarixdə cinayət işi başlanıb. İstintaq gedişatında toplanmış sübutlara əsasən Elçin Ələkbərov Cinayət Məcəlləsinin müxtəlif maddələri ilə təqsirləndirilən şəxs qismində cəlb olunmaqla barəsində məhkəmənin qərarı ilə həbs qətimkan tədbiri seçilib."