Rusiya əsirliyində nə qədər ukraynalı ölüb? - MN rəqəmləri açıqladı
Rusiyanın Ukraynaya genişmiqyaslı müdaxiləsindən sonra ən azı 177 ukraynalı əsir rus əsirliyində ölüb.
Qaynarinfo xəbər verir ki, bu barədə "Politico” Ukrayna Müdafiə Nazirliyinin məlumatlarına istinadən yazır.
Eyni zamanda, Müdafiə Nazirliyinin Müharibə Əsirlərinin Müalicəsi üzrə Koordinasiya Qərargahının nümayəndəsi Viktoriya Tsimbalyukun sözlərinə görə, beynəlxalq nəzarətin olmaması səbəbindən ölənlərin real sayı çox güman ki, daha çoxdur, çünki bütün cəsədlər qaytarılmır və bir çoxunun əsirlikdə olması Rusiya tərəfindən təsdiqlənmir:
"Onlar Rusiya həbsxanalarında nə qədər çox qalırlarsa, ölümə bir o qədər yaxınlaşırlar”.
Moskva ilə Kiyev arasında əsir mübadiləsi nəticəsində 3600-ə yaxın ukraynalı hərbi əsir və deportasiya olunmuş vətəndaşlar geri qaytarılıb. Bununla belə, minlərlə insan hələ də Rusiya zindanlarındadır, - nəşr qeyd edir.
BMT-nin İnsan Hüquqları üzrə Ali Komissarlığının daha əvvəl dərc etdiyi hesabatda qeyd edildiyi kimi, əsir düşən hərbi qulluqçulara işgəncə verilməsi "geniş və sistemli” olub və Rusiya rəhbərliyinin xeyir-duası ilə baş verib.
Hesabatın müəllifləri əlavə ediblər ki, 2023-cü ilin mart ayından bəri ukraynalıların 11 ölümü, o cümlədən qeyri-müəyyən sayda intihara cəhd və "ehtimal ki, təkrar işgəncələr nəticəsində bir sənədləşdirilmiş intihar hadisəsi” qeydə alınıb.
Bu ilin fevralında Ali Radanın insan haqları üzrə komissarı Dmitri Lubinets 28 min Ukrayna vətəndaşının Rusiya əsirliyində olduğunu bildirib.
Genişmiqyaslı işğalın başlanğıcından indiyədək 57 hərbi əsir mübadiləsi aparılıb və 3672 ukraynalı evlərinə qaytarılıb. Azadlığa çıxan əsgərlər Rusiya həbsxanalarında gördükləri zorakılıq və işgəncələrdən danışırlar. Bundan əlavə, ukraynalılar evlərinə ağır vəziyyətdə qayıdırlar - onlar həddindən artıq arıqlayır və tibbi yardıma ehtiyac duyurlar.
Xəbərə reaksiyanız necə oldu?
